الدنيا بقت كلها مشاكل

الدنيا بقت كلها مشاكل ...

بنشكي ولا حدش سامع , تقولش بنكلم نفسنا ...

حالتنا بقت تصعب عالكافر ، والسادة المسئولين ودن من طين والتانية ابلاتين ...

بعد تفكير عميق عميق بتاع اتنين كيلو وجدت الحل أخيرا ....

حيث أننا جميعا في هذا المنتدى وغيره من المنتديات وكافة فئات الشعب تصرخ وتصيح لحد ما زهقنا..


ودائما ما تكون النتيجه هي لامجيب ولا مغيث إلا رحمة ربك لمن رحم

وحيث أن حكومتنا الرشيده النجيبة لا تسمع ولا ترى ولا تجيب

فأني أرى أن تقوم الحكومة بعمل أكتتاب شعبي يساهم فيه كل المصريين كون

الهدف منه بناء حائط كبير ليقوم كل مواطن مش عاجبه بالذهاب للحائط وضرب رأسه فيه

مش عاجبك الفساد ... مش عاجبك البطاله ... مش عاجبك الكساد ...

مش عاجبك الأسعار ..... الضرائب ... الشوارع ....مش عجبك جمال مبارك


روح أخبط راسك في الحيطة


وبهذا تكون الحكومة قد أراحت نفسها وأراحتنا من كتر الكلام

على أن يتم عمل نموذج مصغر من هذا الحائط بكافة سفارات مصر بالخارج حتى

يقوم السادة المغتربين أمثالنا بضرب رؤسهم هناك .... حتي لا نحرمهم من هذا

الحق القومي المكفول لهم حتي لو هم في الغربة .....


و حتى يكون للحائط فائدة إقتصادية , أقترح تحصيل مبلغ 5 جنيهات كرسوم لخبط

الرأس فى الحائط, و تخفيض هذه الرسوم للأطفال دون سن 10 سنوات, و كبار

السن, فوق 50 سنة, الى 2 جنيه فقط, رأفة بحالهم.

و يمكن الدفع نقدا, أو بشيك, أو بإذن بريد, أو بفيزا كارد.

كما أقترح تخفيض للمجموعات التى تزيد عن عشرين شخصا, حيث يخفض الرسم

الى 3 جنيهات فقط, و فى هذه الحالة, سيكون الإسبرين, و الشاش و

الميكروكروم مجانا, و لكن لا مانع من بقشيش( إنت و ذوقك, و حسب مقامك ياباشا).


وحتي يتضح لكم اني جاد فقد قمت بعمل خطة مدروسة من اتنين طهقانين

والضغط عندهم اعلي من مستوي الضغط الجوي


أولا لابد من ادراج الموضوع فى الخطة

وبعدين تقدير التكلفة

وبعدين تدبير الاعتمادات

الاعتمادات موش موجودة ممكن يتعمل اكتتاب شعبى بعد حشد الصحافة للدعاية

للمشروع القومى فى عصر القائد والزعيم والفكر الجديد .. وبعدين يعلن الوزراء عن

تبرع الموظفين بثلاث أيام من مرتبهم للمساهمة فى المشروع

، وممكن (ام عبدو) بتاعة الخضار تتبرع باتنين كيلو خيار يطري علي قلب الموظفين لما نخصم من مرتباتهم

وبعدين يتم تشكيل لجنة عليا لشئون الحيطة برئاسة الدكتور نظيف (القطنة ما بتكدبش)

وبعدين يتم اعداد تصميم للحيطة بمعرفة فاروء حوستى من خلال مكتب تصميمات


عالمى فرنسى ، احنا عايزين حيطة حضارية نتفاخر بيها قدام العالم كله ، ده احنا

اللي بنينا الهرم واحنا اللي دهنا الهوا دوكو يعني احنا لينا سمعتنا التقيلة زي

الخيبة التقيلة


وبعدين يتم الاعلان عن مناقصة عالمية يتم ترسيتها على شركة فرنسية

وبعد كده يتم تشكيل مجلس أعلى لشئون الحيطه منبثق عن اللجنة العليا وتكون

برئاسة الوزير الشاب بانى الصروح سليمان (وانت فيـــــــن يا سلامــــــــــة)

وطبعا هيكون الدخول لمنطقة الحيطة مجانا .. وسيأتى المواطنين من كل حدب

وصوب وبالتالى سيتم تشكيل شرطة متخصصة لتنظيم المرور ..



لاقامة مشروعات سياحية ومراجيح ومولد نبيع فيه حمص وحصان حلاوة يا حلاوة

وطبعا كله هيسترزق .. وسيكون خبط الراس في الحيطة بعد دفع المعلوم ..

وكذلك ستكون فى الحيط حته طريه وحته ناشفه وكل برغوت على قد دمه



ولكن اللي مخوفني اقوم بالمشروع القومي العظيم ده هو حدوث المأساه أن يأتى


جماعة صعايدة ينطحوا الحيط فتنهار وتقتل 300 وستكون النتيجة احالة عسكرى

المرور الى المحاكمة وفرض رسم على الدخول .. سيتم زيادته فى الشهر التالى

لزوم تحسين الخدمة

وبكده نكون قضينا علي البطالة اللي منتشرة زي الجراد بين الشباب ويبقي

مالهوش حجة علشان يقعد علي القهاوي

وكمان الحيطة هتكون مزار سياحي وممكن سياح العالم الغربي يجوا عندنا يخبطوا

روسهم ويدفعوالنا بالعمالة الصعبة وبكده هننشط السياحة

وبكده الاقتصاد هينعنش ويفرفش كده والعيشة تزهزه والقشية هتبقي معدن

والعيال تتجوز واللي مش عايز اهي الحيطة عنده انا هاحرق قلبي معاه ليه






يا معلم (دحروج) شغل الدفاية الحيطة سقعانة



وإن شاء الله هنعمم الصرح العظيم فى كُل المنتديات عشان اللى مش عاجبه


يضرب راسه فى اقرب حيط له

تحياتى للجميع وانا هكون أول واحد طبعا

م.ل.......................

شكرا لمرورك